ಸಗ್ಳೆಂ ಇಂಡಿಯಾ Lock Down ಜಾವ್ನ್ ಕೊಣೆಂಯೀ ಘರಾ ಭಾಯ್ರ್ ವಚುಂಕ್ ನಾ ಮ್ಹಣ್ ಸರ್ಕಾರಾನ್ ಆದೇಶ್ ದಿಲ್ಲ್ಯಾನ್ ಘರಾ ಭಿತರ್ ಫಿಚಾರ್ ಜಾಲ್ಲೊ ಇಂಟ್ರೂ ಬಾಬಣ್ಣ ವಿರಾರ್ ಜಾವ್ನ್ ಗೆಲ್ಲೊ. ಪಯ್ಲೆಂ ಪಯ್ಲೆಂ ಅಪ್ಣೆಂಚ್ ಬರಯಿಲ್ಲಿಂ, ಹೆರ್ ಕೊಣೆಂಯೀ ವಾಚ್ಚೆಂ ಸೊಡ್ಯಾಂ, ಹುಂಕುನ್ ಸಯ್ತ್ ಪಳೆಯ್ನಾತುಲ್ಲಿಂ ಆಪ್ಲ್ಯಾ ವೆಬ್ಸಾಯ್ಟಿಂತ್ ಆಪ್ಣೆಂಚ್ ಬರವ್ನ್, ಎಡಿಟ್ ಕರ್ನ್, ಫಾಯ್ಸ್ ಕರ್ನ್, ಶೇರ್ ಕರ್ನ್, ಲೈಕ್ ಕರ್ನ್, ಚ್ಯಾರ್ ಪಾಂಚ್ ಫೇಕ್ ಐಡಿ ಮುಖಾಂತ್ರ್ ಮ್ಹಣ್ ಆಪ್ಣೆಂಚ್ ಹೊಗೊಳ್ಶಿಲ್ಲಿಂ ಬುರ್ಶಿಂ ಬರ್ಪಾಂ ವಾಚುಂಕ್ ಧರ್ಲಿಂ. ಏಕ್ ದೋನ್ ಬರ್ಪಾಂ ವಾಚುನ್ ಕಾಡ್ತಾನಾ, ವಯ್ರ್ ಬರಯಿಲ್ಲೆಂಚ್ ಸಕಯ್ಲ್ ಬರಯಿಲ್ಲೆಂ ತಾಚ್ಯಾ ಗುಮಾನಾಕ್ ಆಯ್ಲೆಂ ದೆಕುನ್, ವಯ್ಲೆ ಆನಿ ಸಕಯ್ಲೆ ಪ್ಯಾರಾ ಸೊಡ್ನ್ ಮಧ್ಲೆಂ ಮಾತ್ರ್ ವಾಚುಂಕ್ ಮುಕಾರ್ಸಿಲೆಂ. ಅಶೆಂ ಚ್ಯಾರ್ ಬರ್ಪಾಂ ವಾಚುನ್ ಕಾಡ್ತಾನಾ ಆದ್ಲ್ಯಾ ಬರ್ಪಾಂತ್ ಬರಯಿಲ್ಲೆಂ ಮುಕ್ಲ್ಯಾ ಬರ್ಪಾಂತ್ ಬರಯಿಲ್ಲೆಂ ತಾಚ್ಯಾ ಗುಮಾನಾಕ್ ಯೇವ್ನ್, 'ಹೆಂ ಕಾಂಯ್ ಬರ್ಕಾತ್ ನಾ' ಮ್ಹಳ್ಳೆಂ ತಾಕಾ ಗಮ್ಲೆಂ.
ಹ್ಯಾ ಸರ್ಕಾರಾಕ್ ತಕ್ಲಿ ಸಮಾ ನಾ, ಅಶೆಂ ಕಂಪ್ಲೀಟ್ ಲಾಕ್ ಡಾವ್ನ್ ಕೆಲ್ಯಾರ್ ಮ್ಹಜೆತಸ್ಲ್ಯಾ ಸುಪಾರಿ ಪತ್ರಕರ್ತಾನ್ ದೀಸ್ ತರೀ ಕಶೆ ಕಾಡ್ಚೆ? ದಿಸಾಕ್ ದೋನ್ ವರಾಂ ಪುಣೀ ಭಾಯ್ರ್ ವಚುಂಕ್ ಜಾಲ್ಲೆಂ ತರ್ ಕುಜುಲಿ ಧರ್ನ್ ಘರಾ ಘರಾಂಕ್ ಚಂದಾ ಮಾಗುಂಕ್ ಪುಣೀ ವಚ್ಯೆತೆಂ. ಚಂದಾ ಮೆಳಾನಾತ್ಲ್ಯಾರೀ ವ್ಹಡ್ ನಾ ಆಸ್ಲೆಂ, ಘರಾ ಬಾಗ್ಲಾಕ್ ಆಯ್ಲಾ ನೇ ಮ್ಹಳ್ಳ್ಯಾ ದಾಕ್ಷೆಣೆಕ್ ಕೋಣ್ ದೋನ್ ಪೆಗ್ ವೊತುನ್ ದಿತಾಲೊ, ಕೋಣ್ ಚ್ಯಾ-ಕಾಫಿ ದಿತಾಲೊ, ಕಾಂಯ್ ನಾ ತರೀ ಏಕ್ ಗ್ಲಾಸ್ ಉದಾಕ್ ಆನಿ ಚ್ಯಾರ್ ಬಿಸ್ಕುಟಾಂ ಪುಣೀ ಮೆಳ್ತಾಲಿಂ. ಹ್ಯಾ ಸರ್ಕಾರಾನ್ ತಾಕಾಯೀ ಶೆಳೆಂ ಉದಾಕ್ ವೊತ್ಲೆಂ. ಕೋಣಾಕೀ ಭೆಷ್ಟಾವ್ನ್, ಫುಸ್ಲಾವ್ನ್, ಬ್ಲ್ಯಾಕ್ ಮೇಲ್ ಕರ್ನ್ ಇಂಟ್ರೂ ಕರ್ನ್ ಚ್ಯಾರ್ ಕಾಸ್ ಮೆಳೊನ್ ಆಸ್ಲೆ, ತೆಯೀ ನಾಂತ್.. ಬರೆಂ ಜಾಲೆಂ, ತ್ಯಾ ಪುರ್ವಿತಾಚ್ಯಾ ಮರ್ಣಾಂತ್ ಕೊಣಾ ಕೊಣಾಚೆರ್ ಆಪ್ರಾಧ್ ಮಾಂಡುನ್ ಬರವ್ನ್ ತಾಚ್ಯಾ ಆಭಿಮಾನಿನಿಂ ಕೆನಡಾ, ಇಸ್ರೇಲ್ ಆನಿ ಗಲ್ಫಾ ಥಾವ್ನ್ ಕಾಂಯ್ ಥೊಡೆ ಲಾಖ್ ಧಾಡ್ಲೆಲೆ ಹಾತಾಂತ್ ಆಸುಲ್ಲ್ಯಾನ್ ಕೊಕೊ-ಮೆಮೆ ಪುಣೀ ಚಲ್ತಾ, ನಾಂ ತರ್ ನೊ ಪೇಜ್, ನೋಟ್ ಈವನ್ ನೀಸ್ ಮ್ಹಣ್ಚಿ ಗತ್ ಜಾತಿ ಮ್ಹಜಿ. ಅಶೆಂ ಚಿಂತುನ್ ಚಿಂತುನ್ ತಾಚಿ ತಕ್ಲಿ ವಿರಾರ್ ಜಾವ್ನ್ ಗೆಲ್ಲಿ.
ಆತಾಂ ಬಾಬಣ್ಣಾಚೆ ಸಮಸ್ಯೆ ಮ್ಹಳ್ಯಾರ್ ತಾಕಾ ಬಸುಲ್ಲೆ ಕಡೆನ್ ಬಸೊಂಕ್ ಜಾಯ್ನಾತ್ಲೆಂ. ದಿಸಾಕ್ ಎಕ್ಲ್ಯಾಕ್ ಪುಣೀ ಧರ್ನ್ ತಾಕಾ ಯಾ ತಾಚ್ಯಾ ಮುಖಾಂತ್ರ್ ಹೆರಾಂಕ್ ಆಕ್ಮಾನ್ ಕರ್ನ್ ಚ್ಯಾರ್ ಸಬ್ಧ್ ಪುಣೀ ಬರಯ್ನಾತ್ಲ್ಯಾ ತಾಕಾ ಪೊಟಾಂತ್ ಏಕ್ ಥರ್ ಮರ್ಕ್-ಸಂಕಟ್ ಜಾತಾಲೆಂ. ತಸಲೆ ಕಡೆಂ ಏಕ್ ಹಫ್ತೊ ಜಾಲೊ, ಕೊಣಾಯ್ಚೆ ವೆಕ್ತಿತ್ವಾಚೆರ್ ಹಮ್ಲೊ ಕರಿನಾಸ್ತಾನಾ! ಮರ್ಕ್ ಸಂಕಟ್ ತಡ್ವುಂಕ್ ಜಾಯ್ನಾಸ್ತಾನಾ, ಸಕ್ಕಡ್ ಪಿಡೆಂಕ್ ವೊಕಾತ್ ದಿಂವ್ಚ್ಯಾ ಫ್ಯಾಮಿಲಿ ದಾಕ್ತೆರಾಕ್ ಫೋನ್ ಕರ್ನ್ ಆಪ್ಲೆ ಕಷ್ಟ್ ತಾಚೆಲಾಗಿಂ ಉಚಾರ್ನ್ ಕಾಂಯ್ ಪುಣೀ ಪರಿಹಾರ್ ಆಸಾಗೀ ವಿಚಾರ್ಯಾಂ ಮ್ಹಣ್ ತಾಕಾ ಫೋನ್ ಘುಂವ್ಡಾಯ್ಲೆಂ.
"ಹಲೋ ದಾಕ್ತೆರಾಬಾ, ಹಾಂವ್ ವಡ್ಲ್ಯಾ ಕಷ್ಟಾಂಕ್ ಸಾಂಪ್ಡಾಲಾಂ. ಪೋರ್ Lock Down ಘೋಷಿತ್ ಜಾಲ್ಲೆದೀಸ್ ಥಾವ್ನ್......" ಎಕಾಚ್ ಧಮ್ಮಾರ್ ಆಪ್ಲೆ ಸಮಸ್ಯೆ ವಿವರ್ಸಿಲೆ ಬಾಬಣ್ಣಾನ್.
ತೊ ದಾಕ್ತೆರ್ ಹಾಕಾ ಬರ್ಯಾನ್ ವಳ್ಕಾತಾಲೊ ಜಾಲ್ಲ್ಯಾನ್, ಹಾಚೆ ಪಿಡೆ ವಿಶಿಂಯೀ ತಾಕಾ ಬರೀ ಮಾಹೆತ್ ಆಸ್ಲಿ ದೆಕುನ್ ತಾಕಾ ಸಮ್ಜೊಂಕ್ ಚಡ್ ವೇಳ್ ಗೆಲೊನಾ.
"ಅಳೇ, ತಜಿ ಪಿಡಾ ಆಸಾ ಪಳೆ, ತಿ ಏಕ್ ವಕಾತ್ ನಾತ್ಲಿ ಪಿಡಾ. ವಕಾತ್ ಆಸ್ಲಿ ತರ್ ತುಕಾ ಹಾಂವ್'ಚ್ ಟ್ರೀಟ್ಮೆಂಟ್ ದಿತೊಂ. ಹಿ ಗಜಾಲ್ ಹಾವೆಂ ತುಕಾ ಹಾಚ್ಯಾ ಪಯ್ಲೆಂಯೀ ಸಾಂಗ್ಲ್ಯಾ. ತುಕಾ ದಿಸಾಕ್ ಎಕ್ಲ್ಯಾಚೆರ್ ಪುಣೀ ನಂಜ್ಯೊ ವೊಂಕಿನಾ ತರ್ ತ್ಯಾ ನಂಜೆಚಿಂ ವೈರಸಾಂ ತುಜೆಭಿತರ್ ವಾಡೊನುಂಚ್ ವೆತಾತ್, ಆನಿ ಭೊರೊನ್ ವೊಮ್ತೊಂಕ್ ಜಾಲಿಂ ಮ್ಹಣ್ತಾನಾ ತುಕಾ ಪೊಟಾಂತ್ ಆಡ್ವಳುಂಕ್ ಸುರು ಜಾತಾ. ಏಕ್ ಪಾವ್ಟಿಂ ತಿ ನಂಜಿ ವೊಂಕುನ್ ಭಾಯ್ರ್ ಘಾಲ್ಲೆಂಚ್ ತುಂ Normal ಜಾತಾಯ್."
ತೆಂ ಮಾಕಾ ಗೊತ್ತಾಸಾ ದಾಕ್ತೆರಾಬಾ. ಪುಣ್ ಹಾಂಗಾ ಪರಿಸ್ಥಿತಿ ಅಶಿ ಆಸಾಗೀ ಭಾಯ್ರ್ ವಚುನ್ ಕೊಣಾಚಿ ಪುಣೀ ಇಂಟ್ರೂ ಕರ್ನ್ ಕೊಣಾಚೆರ್ ಪುಣೀ ನಂಜ್ಯೊ ವೊಂಕ್ಯಾಂ ಮ್ಹಳ್ಯಾರ್, ಹ್ಯಾ Lock Down ಕ್ ಲಾಗುನ್ ಭಾಯ್ರ್ ವಚುಂಕ್ ಜಾತೇ ನಾ. ಕಶೆಂ ಪುಣೀ ಕರ್ನ್ ಭಾಯ್ರ್ ಗೆಲೊಂಚ್ ಮ್ಹಣ್ಯಾಂ, ತ್ಯಾ ಪುರ್ವಿತಾಚಿ ಕೇಸ್ ಧೂದ್ ಕಾ ಧೂದ್, ಪಾನಿ ಕಾ ಪಾನಿ ಜಾಲ್ಯಾ ಉಪ್ರಾಂತ್ ಮ್ಹಜಿ ಅಸ್ಲಿಯತ್ ಸಕ್ಡಾಂಕ್ ಕಳ್ಳ್ಯಾ ದೆಕುನ್ ಸದ್ದ್ಯಾಕ್ ಕೊಣೆಂಯೀ ಮಾಕಾ ಇಂಟ್ರೂ ದಿಂವ್ಚೆಪರಿಂ ದಿಸಾನಾ. ಅಶೆಂ ಆಸ್ತಾಂ ದುಸ್ರೊ ಕಾಂಯ್ ಪುಣೀ ಉಪಾವ್ ಆಸ್ಲ್ಯಾರ್ ಸಾಂಗಾ ದಾಕ್ತೆರಾಬಾ ಅಡ್ದೊಸ್ ಮಾಗಿಲಾಗ್ಲೊ ಬಾಬಣ್ಣ!
ಅಳೇ ತುಜ್ಯಾ ಕೇಸಿಂತ್ ಕಶೆಂಗೀ ಮ್ಹಳ್ಯಾರ್, ತುಕಾ ನಂಜಿ ವೊಂಕುಂಕ್ ಮನಿಸ್'ಚ್ ಜಾಯ್ಜೆ ಮ್ಹಣ್ ನಾ. ರೂಕ್ ಝಡಾಂ ಮನ್ಜಾತಿ, ಫಾತರ್, ಉದಾಕ್ ಅಶೆಂ ಖಂಚೆಂಯೀ ಜಾತಾ. Any Object Living Or Dead!
ತೆಂ ಕಶೆಂ ದಾಕ್ತೆರಾಬಾ? ಮಾಕಾ ಸಮ್ಜೊಂಕ್ ನಾ. ಇಲ್ಲೆಂ ಸೊಡವ್ನ್ ಸಾಂಗ್ತಾತ್ ಗೀ? ಆಜ್ಯಾಪುನ್ ವಿಚಾರ್ಲೆಂ ಬಾಬಣ್ಣಾನ್.
ಅಳೇ ಆಮ್ಚೊ ಟೊಮಿ ಆಸಾ ಪಳೆ, ತಾಕಾ ಆಮಿ ಹಫ್ತ್ಯಾಕ್ ಏಕ್ ಪಾವ್ಟಿಂ ಹಾಡಾಂ ಹಾಡ್ನ್ ಘಾಲ್ತಾಂವ್. ಪುಣ್ ಆತಾಂ ಕರೆಜ್ಮಾಂತ್ ಆಮಿ ಮಾಸ್ ಮಾಸ್ಳಿ ಖಾಯ್ನಾಂವ್ ದೆಕುನ್ ಪಾಸ್ಕಾ ಫೆಸ್ತಾ ಮ್ಹಣಾಸರ್ ತಾಕಾಯೀ ಹಾಡಾಂ ಮೆಳ್ನಾಂತ್. ಪುಣ್ ಹಾಡಾಂ ಚಾಬೊನ್ ಸವಯೆರ್ ಪಡುಲ್ಲೆ ತಾಚೆ ದಾಂತ್ ವಗೆ ರಾವೊಂಕ್ ಆಯ್ಕಾನಾಂತ್, ಖೊರ್ಜುಂಕ್ ಸುರು ಜಾತಾತ್. ದೆಕುನ್ ತಿ ಖೊರೊಜ್ ಕಾಡುಂಕ್ ತೊ ಪ್ಲಾಸ್ಟಿಕಾಚ್ಯೊ ಬೊತ್ಲ್ಯೊ, ವ್ಹಾಣೆ, ಶಿತಾಚಿ ಬಶಿ, ಗೊಬ್ಳೊ, ಮಾಡಾ ಮುಳಾಂತ್ ಆಸುಲ್ಲಿಂ ಸೊಣ್ಣಾಂ, ಕಟ್ಟ್ಯೊ ಅಶೆಂ ಮೆಳುಲ್ಲೆಂ ಚಾಬೊನ್ ಆಪ್ಲ್ಯಾ ದಾಂತಾಂಚಿ ಖೊರೊಜ್ ಕಾಡ್ತಾ. ಕಾಂಯ್ಚ್ ಮೆಳ್ನಾಂ ತರ್ ಆಮ್ಚಿಂಚ್ ಮಾಸಾಂ! ಹಾಂಗಾ ಜಶೆಂ ಟೊಮಿಕ್ ಹಾಡಾಂಚ್ಯಾ ರೂಚಿ ಪ್ರಾಸ್ ತಾಚ್ಯಾ ದಾಂತಾಂಚಿ ಖೊರೊಜ್ ಚಡ್ ಧೊಸ್ತಾ ತಶೆಂ ತುಕಾ, ತುಂ ಕೊಣಾ ವಯ್ರ್ ನಂಜ್ಯೊ ವೊಂಕ್ತಾಯ್ ಮ್ಹಣ್ಚೆ ಪ್ರಾಸ್ ಚಡ್, ವೊಂಕುಂಕ್ ಜಾಯ್ನಾಸ್ತಾಂ ತುಜ್ಯಾ ಪೊಟಾಂತ್ ಭರೊನ್ ಯೆಂವ್ಚಿಂ ನಂಜೆಚಿ ವೈರಸಾಂ ಚಡ್ ಧೊಸ್ತಾತ್. ತುವೆಂ ಜಾತಾ ತಿತ್ಲೆ ವೆಗಿಂ ಏಕ್ ಇಂಟ್ರೂ ಕರಿಜೆ ಆನಿ ತುಜೆ ಭಿತರ್ಲಿ ನಂಜಿ ಭಾಯ್ರ್ ಘಾಲಿಜೆ!
ವಾವ್ ದಾಕ್ತೆರಾಬಾ. ತುಮಿ ದಾರ್ಶನಿಕ್ ದಾಕ್ತೆರ್ ಮ್ಹಣ್ಚೆಂ ಭೆಷ್ಟೆಂ ನ್ಹಯ್. ಏಕ್ ಪಾವ್ಟಿಂ ಹಿ ಇಂಟ್ರೂ ಕರ್ನ್ ಜಾವ್ನ್ ಪೊಟಾಂತ್ ಆಡ್ವಳ್ಚೆಂ ರಾವೊಂದಿ. ತುಮ್ಚ್ಯಾ ಗಿನ್ಯಾನಾಕ್ ತುಮ್ಕಾಂ ನೋಬೆಲ್ ಪುರಸ್ಕಾರ್ ಮೆಳಾಜೆ ಮ್ಹಣ್ ಬರೋಬರ್ ಆಟ್ ಎಪಿಸೋಡಾಂಚಿ ಸ್ಟೋರಿ ಕರ್ನ್ ತುಮ್ಚಿ ಜಾಣ್ವಾಯ್ ಸರ್ಕಾರಾಚ್ಯಾ ಗುಮಾನಾಕ್ ಹಾಡ್ತಾಂಗೀ ನಾಂ ಪಳೆಯಾ. ಹಾಂ ಸಾಂಗ್ಲೆಪರಿಂ ತುಮಿ ಇತ್ಲೊ ಪರಿಹಾರ್ ಸಾಂಗ್ಲೊ. ಅಕ್ರೇಚಿ ಏಕ್ ಕುಮಕ್ ಕರಾ. ಕೊಣಾಚಿ ಇಂಟ್ರೂ ಕರ್ಚಿ ಮ್ಹಳ್ಳಿ ಐಡಿಯಾಯೀ ತುಮಿಂಚ್ ದಿಯಾ!
ತುಕಾ ಐಡಿಯಾ ಕಾಲೆಂ ದಿಂವ್ಚಿ ಸಾಯ್ಬಾ. ಆಜ್ ಸಂಸಾರ್ ಭರ್ ಕೊರೋನಾಚೆಂಚ್ ದಳ್ಬಾರ್. ಸಗ್ಳ್ಯಾಂಚ್ಯಾ ತೊಂಡಾರ್ ಏಕ್'ಚ್ ನಾಂವ್ ಕೊರೋನಾ ಆನಿ ಏಕ್'ಚ್ ರುದಾನ್ ಬಸ್ ಕರೋ ನಾ! ಅಶೆಂ ಆಸ್ತಾನಾ ತುಂ ಕೊರೋನಾ ವೈರಸಾಚಿ ಇಂಟ್ರೂ ಕರ್ನ್ ಘಾಲ್ಶಿ ತರ್ ತಿ ಸಂಸಾರ್ ಭರ್ ಸೆನ್ಶೇಶನಲ್ ಜಾತೆಲಿ ಖಂಡಿತ್!
ವಾವ್ ದಾಕ್ತೆರಾಬಾ. ದಾಕ್ತೆರಾಬಾ. ತುಮ್ಚೆ ತಸ್ಲೊ ಗಿನ್ಯಾನಿ ಮ್ಹಜೊ ಫ್ಯಾಮಿಲಿ ದಾಕ್ತೆರ್ ಜಾಲ್ಲೆಂ ಮ್ಹಜೆಂ ಭಾಗ್! ಪುಣ್ ದಾಕ್ತೆರಾಬಾ ಕೊರೋನಾ ವೈರಸಾ ಲಾಗಿಂ ಗೆಲ್ಯಾರ್ ತೆಂ ವೈರಸ್ ಮ್ಹಜೆರ್ ಅಟ್ಯಾಕ್ ಕರಿತ್ ತರ್.?
ನಾಂ ನಾಂ.. ತಶೆಂ ಕಾಂಯ್ ಭಿಯೆಜೆ ಮ್ಹಣ್ ನಾ. ತೊಂಡಾಕ್ ಏಕ್ ಮಾಸ್ಕ್ ಘಾಲ್ನ್ ವೈರಸಾ ಥಾವ್ನ್ ಸ ಫುಟಿಂಚ್ಯಾ ಅಂತರಾರ್ ರಾವೊನ್ ಇಂಟ್ರೂ ಕೆಲ್ಯಾರ್ ಜಾಲೆಂ. ಕಾಂಯ್ ತೊಂದ್ರೆ ಜಾಯ್ನಾಂತ್. ಮಾಗಿರೀ ತಶೆಂ ಕಾಂಯ್ ಜಾಯ್ತ್ ತರ್ ಹಾಂವ್ ಆಸಾ ನೇಂ.. ಭಿಯೆನಾಕಾ!
ಜಾಯ್ತ್ ದಾಕ್ತೆರಾಬಾ. ತುಮಿ ತಿತ್ಲೆಂ ಸಾಂಗ್ಲ್ಯಾ ಉಪ್ರಾಂತ್ ಮಾಕಾ ಕಾಲ್ಯಾಚೆಂ ಭೆಂ? ಪುರ್ವಿತಾಚ್ಯಾ ಕೇಸಿಂತ್ ಸಯ್ತ್ ಸುರು ಥಾವ್ನ್ ಆಜ್ ಪರ್ಯಾಂತ್ ತುಮಿ ಸಾಂಗುಲ್ಲೆಂ ಆಸಾ ತಶೆಂ ಪಾಳುನ್ ಆಸಾಂ ಹಾಂವ್! ಆತಾಂಚ್ ಭಾಯ್ರ್ ಸರ್ತಾಂ ಮ್ಹಣುನ್ ಕೋಲ್ ಕಟ್ ಕೆಲೆಂ ಬಾಬಣ್ಣಾನ್.
*******************************
ಬಾಬಣ್ಣಾನ್ ಕಾಂಯ್ ಶೆಂಭರ್ ಕೊಲಾಂ ಕೆಲಿಂ, ಕೊರೋನಾ ವೈರಸ್ ಆಸುಲ್ಲ್ಯಾ ಪಿಡೆಸ್ತಾಂಕ್ ಸಂಪರ್ಕ್ ಕರುಂಕ್! ತಸಲ್ಯಾ ಪಿಡೆಸ್ತಾಂಚೊ ಸಂಪರ್ಕ್ ವಿವರ್ ದೀಂವ್ಕ್ ಕೊಣೀ ತಯಾರ್ ನಾತುಲ್ಲೆ. ಪುಣ್ ಬಾಬಣ್ಣಾನ್ ಹಟ್ ಸೊಡ್ಲೆಂ ನಾ. ಹಿ ಏಕ್ ಇಂಟ್ರೂ ಕರಿನ್ ತರ್ ಹಾಂವ್ ವರ್ಲ್ಡ್ ಫೇಮಸ್ ಖಂಡಿತ್ ಜಾತಾಂ, ಸಾಂಗಾತಾ ಹ್ಯಾ ದಳ್ದಿರ್ ಪೊಟ್ಕಾಣೆ ಥಾವ್ನ್ ಮಾಕಾ ಸುಟ್ಕಾಯೀ ಮೆಳ್ತಾ. ಏಕ್ ಪಾವ್ಟಿಂ ವರ್ಲ್ಡ್ ಫೇಮಸ್ ಜಾಲ್ಯಾರ್ ಪುರ್ವಿತಾಚ್ಯಾ ಕೇಸಿಂತ್ ಹೊಗ್ಡಾಯಿಲ್ಲೊ ಮಾನ್ ಪಾಟಿಂ ಮೆಳ್ತಾ, ಮಾಗಿರ್ ಕಾಂಯ್ ಭಿರಾಂತ್ ನಾಸ್ತಾನಾ ಮ್ಹಜೊ ಸುಪಾರಿ ಧಂದೊ ಮುಕಾರ್ಸಿಯೆತ್ ಮ್ಹಣ್ ಲೇಕ್ ಘಾಲ್ನ್ ನಿರಂತರ್ ಪ್ರೇತನ್ ಕರಿತ್ ಆಸ್ಲೊ ತೊ. ಅಕ್ರೇಕೀ ತಾಚ್ಯಾ ನಶೀಬಾಚೆಂ ದಾರ್ ಉಘಡ್ಲೆಂ. ಎಕ್ಲ್ಯಾ ಪಿಡೆಸ್ತಾಚೊ ವಿವರ್ ಮೆಳ್ಳೊ. ತಕ್ಷಣ್ ಕೋಲ್ ಕೆಲೆಂ ಬಾಬಣ್ಣಾನ್.
ಹಲೋ ದಿಸ್ ಈಸ್ ಇಂಟ್ರೂ ಬಾಬಣ್ಣ ಸ್ಪೀಕಿಂಗ್. ಚೀಪ್ ಎಡಿಟರ್ ಓಫ್ ವರ್ಲ್ಡ್ ಫೇಮಸ್ ಮಲ್ಟಿಲಿಂಗುವಲ್, ಮಲ್ಟಿಸ್ಟ್ಯಾಂಡರ್ಡ್, ಸೆನ್ಶೇಶನಲ್ ವೆಬ್ಸೈಟ್ ಕುಜಿಲಿ.ಕೊಮ್. ವೆರಿ ಫೇಮಸ್ ಸುಪಾರಿ ಟೇಕರ್, ಇಂಟ್ರೂ ಮೇಕರ್ ಅಂಡ್ ಟ್ರಬಲ್ ಕ್ರಿಯೇಟರ್!
ಹಲೋ ತುಂ ಕೋಣ್ ಜಾಲ್ಯಾರ್ ಮಾಕಾ ಕಿತೆಂ ಸಾಯ್ಬಾ? ಮಾಕಾ ಕಾಲ್ಯಾಕ್ ಕೋಲ್ ಕೆಲಾಯ್ ಸಾಂಗ್.
ಹೆಂ... ಹೆಂ... ತಾಚ್ಯಾ ಖಡಕ್ ಉಲವ್ಣ್ಯಾಕ್ ಬಾಬಣ್ಣ ಇಲ್ಲೊಸೊ ಹಾಂಕ್ರೆಲೊ ತರೀ, ಸವ್ಕಾಸ್ ಸುಧಾರ್ಸುನ್ ವರ್ನ್ ತುಮ್ಕಾಂ COVID-19 ಇನ್ಫೆಕ್ಷನ್ ಆಸಾ ಮ್ಹಣ್ ಮಾಕಾ ಖಬಾರ್ ಮೆಳ್ಳಿ. ತ್ಯಾ ವೈರಸಾಚಿ ಇಂಟ್ರೂ ಕರ್ಯಾಂ ಮ್ಹಣ್ ಹಾವೆಂ ತುಮ್ಕಾಂ ಕೋಲ್ ಕೆಲೆಂ. ತ್ಯಾ ವೈರಸ್ ಕಣಾ ಲಾಗಿಂ ಉಲವ್ಯೆತ್ ಗೀ?
ಜಾಯ್ತ್ ದಿತಾಂ ಧರ್ ಮ್ಹಣಾಲೊ ತೊ ವೆಕ್ತಿ
ಹಲೋ ದಿಸ್ ಈಸ್ ಇಂಟ್ರೂ ಬಾಬಣ್ಣ ಸ್ಪೀಕಿಂಗ್. ಚೀಪ್ ಎಡಿಟರ್ ಓಫ್ ವರ್ಲ್ಡ್ ಫೇಮಸ್ ಮಲ್ಟಿಲಿಂಗುವಲ್, ಮಲ್ಟಿಸ್ಟ್ಯಾಂಡರ್ಡ್, ಸೆನ್ಶೇಶನಲ್ ವೆಬ್ಸೈಟ್ ಕುಜಿಲಿ.ಕೊಮ್. ವೆರಿ ಫೇಮಸ್ ಸುಪಾರಿ ಟೇಕರ್, ಇಂಟ್ರೂ ಮೇಕರ್ ಅಂಡ್ ಟ್ರಬಲ್ ಕ್ರಿಯೇಟರ್! ಐ ವಾಂಟ್ ಟು ಮೇಕ್ ಯುವರ್ ಇಂಟ್ರೂ..
ಹೆಕ್ಕ್.. ತೂಂ ಗೀ ಬುರ್ನಾಸಾ? ಮಾಕಾ ಫೋನ್ ಕರುಂಕ್ ಕಿತ್ಲೆಂ ಧಯ್ರ್ ತುಕಾ? ತುಕಾ ಇಂಟ್ರೂ ನ್ಹಯ್, ಪರ್ನ್ಯಾ ವ್ಹಾಣಾಂನಿ ಪೊಪಾಯ್ತೆಲೆ ಕೊಣೀ ನಾ ಜಾಲ್ಯಾತ್ ತುಮ್ಚ್ಯಾ ಗಾಂವಾತ್.
ಹೆಂ ಆಯ್ಕೊನ್ ಬಾಬಣ್ಣಾಕ್ ಕಾಂಯ್ ಅಜ್ಯಾಪ್ ಭೊಗುಂಕ್ ನಾ. ಅಸಲ್ಯೊ ತಾರಿಫೊ ತಾಕಾ ಸದಾಂಚ್ಯೊ ತರೀ, ಪಯ್ಶಿಲ್ಯಾ ಚೀನಾಥಾವ್ನ್ ಆಯಿಲ್ಲ್ಯಾ ಎಕಾ ವೈರಸ್ ಕಣಾಕೀ ಮ್ಹಜಿ ವ್ಹಳಕ್ ಆಸಾ ಮ್ಹಳ್ಯಾರ್? ಹಾಂವ್ ಇಂಟನ್ಯಾಶನಲ್ ಮ್ಹಣ್ ಸಾಂಗ್ತಾನಾ ಮ್ಹಜಿಂ ನಕ್ಲಾಂ ಕರ್ಚೆ ಮ್ಹಜೆ ವಿರೋಧಿ ಪುಣೀ ಆಸ್ಲೆ ತರ್ ಹೆಂ ಆಯ್ಕೊನ್ ಮತ್ ಚುಕೊನ್ ಪಡ್ತೆ ಕೊಣ್ಣಾ. ಆಪ್ಣಾಚಿ ಲೊಕಾ ಮೊಗಾಳಯ್ ನಿಯಾಳ್ನ್ ಹೆಮ್ಮೆ ಪಾವ್ಲೊ ಬಾಬಣ್ಣ.
ಹಲೋ ತೆಂ ತಶೆಂ ನ್ಹಯ್. ಯೂ ಹ್ಯಾವ್ ಟೋಟಲಿ ಮಿಸ್ಟೇಕನ್ ಮಿ. ಹಾಂವ್ ಏಕ್ ಶೀದಾ ಖಡಕ್ ನಿಷ್ಟುರ್ ಪತ್ರಕಾರ್. ತುಂ ಏಕ್ ಪಾವ್ಟಿಂ ಮಾಕಾ ಭೆಟ್ ದಿಶಿ ತರ್ ತುಜೆ ಪೂರಾ ದುಬಾವ್ ಪರಿಹಾರ್ ಜಾತಾತ್. . ಚೀನಾಚ್ಯಾ ವೈರಸಾಕ್ ಇಂಪ್ರೆಸ್ ಕರುಂಕ್ ಪ್ರೇತನ್ ಕರಿಲಾಗ್ಲೊ ಬಾಬಣ್ಣ!
ಹತ್ತ್ ಬುರ್ನಾಸಾ.. ತುಕಾ ಭೆಟ್ ಕರಿನ್ ತರ್ ತುಜಿ ಪಿಡಾ ಮಾಕಾ ಯೇಂವ್ಕ್ ಆಸಾ.
ಹೆಂ ಆಯ್ಕೊನ್ ಬಾಬಣ್ಣಾಚೊ ಫ್ಯೂಸ್ ಇಲ್ಲೊಸೊ ಕನ್ಫ್ಯೂಸ್ ಜಾಲೊ. ನ್ಹಯ್ ದಾಕ್ತೆರಾಬಾನ್ ಸಾಂಗುಲ್ಲೆ ಮಾಸ್ಕ್ ಘಾಲ್ನ್ ವೈರಸಾ ಥಾವ್ನ್ ಸ ಫೀಟ್ ಪಯ್ಸ್ ರಾವ್ಲ್ಯಾರ್ ಮಾಕಾ ವೈರಸ್ ಲಾಗಾನಾ ಮ್ಹಣ್. ಪುಣ್ ಹಾಂಗಾ ಪಳೆಲ್ಯಾರ್ ಹೆಂ ವೈರಸ್ ಮ್ಹಜಿ ಪಿಡಾ ತಾಕಾ ಲಾಗ್ತಾ ಮ್ಹಣ್ತಾ... ಹೆಂ ಚೀನಾಚೆಂ ಪೂರಾ ಅಶೆಂಚ್ ಉಲ್ಟೆಂ ಉಲ್ಟೆಂ ಮ್ಹಣ್ ಮಾಂಡೊ ಕೊರ್ಪಿಲಾಗ್ಲೊ.
ಕೊರೋನಾ, ಡೋಂಟ್ ವರಿ ಕರೋ ನಾ. ಹಾಂವ್ ಆಮ್ಚ್ಯಾ ಫ್ಯಾಮಿಲಿ ದಾಕ್ತೆರಾಲಾಗಿಂ ಕನ್ಸಲ್ಟ್ ಕರ್ನ್ಂಚ್'ಹಾಂಗಾ ಆಯ್ಲಾಂ. ತಾಣಿಂ ಮ್ಹಳಾಂ ಹಾವೆಂ ಮಾಸ್ಕ್ ಘಾಲ್ನ್ ತುಜೆ ಥಾವ್ನ್ ಸ ಫೀಟ್ ಪಯ್ಸ್ ರಾವೊನ್ ತುಜಿ ಇಂಟ್ರೂ ಕೆಲ್ಯಾರ್ ಮಾಕಾ ಇನ್ಫೆಕ್ಷನ್ ಜಾಯ್ನಾ ಮ್ಹಣ್! ಸೊ ಯು ಡೊಂಟ್ ವರಿ ಅಬೌವ್ಟ್ ಮೀ..
ಹೆಂ ಆಯ್ಕೊನ್ ಬಾಬಣ್ಣ ಪುರ್ತೊ ಬೊಲ್ಚೆಲೊ. ಮನ್ಶಾಂಚ್ಯಾ ತೊಂಡಾಥಾವ್ನ್ ಅಪ್ಲೆಂ ಸ್ತುತಿಗಾನ್ ಆಯ್ಕೊನ್ ತಾಕಾ ಸವಯ್ ಆಸ್ಲಿ. ಪುಣ್ ಹೆಂ ಎದೆಶೆಂ ಚೀನೀ ವೈರಸ್ ಅಶಿ ಲದಿನ್ ಕರಿತ್ ಮ್ಹಣ್ ತಾಣೆಂ ಆಪೇಕ್ಸುಂಕ್ ನಾತುಲ್ಲೆಂ. ತಾಚ್ಯಾ ಮುಸ್ಕಾರಾಚೊ ರಂಗ್ ತಾಚ್ಯಾ ವೆಬ್ಸೈಟಿಚ್ಯಾ ರಂಗಾಕ್ ಬದ್ಲಾಲ್ಲೊ - YELLOW! ಜಾಲ್ಯಾರೀ ತಿತ್ಲ್ಯಾ ಸುಲಭಾಯೆನ್ ಸೊಡ್ಚೊ ಮನಿಸ್ ಗೀ ಬಾಬಣ್ಣ. ಎದೊಳ್ ಇತ್ಲ್ಯಾ ವರ್ಸಾನಿಂ ಇಂಟ್ರೂ ವಿಚಾರುಂಕ್ ಗೆಲ್ಲ್ಯಾನಿಂ ಸುಣ್ಯಾಪಾಸ್ಟ್ ಯೆಟುನ್ ಇನ್ಕಾರ್ ಕೆಲ್ಯಾರೀ ತಾಂಚ್ಯಾ ಪಾಂಯಾಕ್ ಪಡೊನ್ ಇಂಟ್ರೂ ದೀಂವ್ಕ್ ಒಪ್ವಾಶೆಂ ಕೆಲ್ಲೆಂ ಸರ್ವ್ Experience ಸಾಂಗಾತಾ ಘಾಲೆಂ ತಾಣೆಂ
ತಶೆಂ ನ್ಹಯ್ ಮಾ ಭಾಂಗಾರಾ ಕೊರೋನಾ. ಮುಜ್ ಪರ್ ಕುಚ್ ರೆಹೆಮ್ ಕರೋ ನಾ. ಮಾಕಾ ಇಂಟ್ರೂ ಕರ್ನ್ ನಂಜಿ ವೊಂಕ್ಚಿ ಏಕ್ ವಿಶೇಸ್ ಪಿಡಾ ಆಸಾ. ಆನಿ ಏಕ್ ದೋನ್ ದಿಸಾ ಭಿತರ್ ಕೊಣಾಚಿ ಪುಣೀ ಇಂಟ್ರೂ ಕರ್ನ್ ಘಾಲ್ನಾತ್ಲ್ಯಾರ್ ಮ್ಹಜಿ ಪಿಡಾ ಚಾಳ್ವತಾ. ಉಪ್ರಾಂತ್ ಕಿತೆಂಯೀ ಅನಾಹುತ್ ಘಡೊಂಕ್ ಸಾಧ್ ಆಸಾ. ಹಾಂವ್ ಕೊಣಾಕ್ ಧರ್ನ್ ಚಾಬ್ಲ್ಯಾರೀ ಚಾಬ್ಲೊಂ. ದೆಕುನ್ ಮಜೆರ್ ನ್ಹಯ್ ತರೀ ಮ್ಹಜೆ ಥಾವ್ನ್ ಚಾಬವ್ನ್ ಘೆತೆಲ್ಯಾಂಚೆರ್ ಪುಣೀ ಭಿರ್ಮತ್ ಪಾವೊನ್ ಏಕ್ ಇಂಟ್ರೂ ದೇದೋ ನಾ ಪ್ಲೀಸ್ ಪರಾತಿಲಾಗ್ಲೊ ಬಾಬಣ್ಣ
ಸಂಯ್ಬಾನ್ ಮಾರೆಕಾರ್ ತರೀ, ಬಾಬಣ್ಣಾನ್ ಪರಾತಿಲ್ಲಿ ರೀತ್ ಆಯ್ಕೊನ್ ಕೊರೋನಾಚೆಂ ಮನ್'ಯೀ ಕಡ್ಲೆಂ. ಹಾಚೆ ಖಾತಿರ್ ನ್ಹಯ್ ತರೀ ಹೆರಾಂ ಖಾತಿರ್ ಪುಣೀ ಹಾಕಾ ಏಕ್ ಇಂಟ್ರೂ ದಿವ್ಯಾಂ. ಹಾವೆಂ ದಿಲ್ಲಿ ಚತ್ರಾಯ್ ಪಾಳ್ನಾತ್ಲ್ಯಾಂಚೆರ್ ಹಾಂವ್ ಧಾರುಣ್ ಜಾಲ್ಲ್ಯಾನ್ ಸಂಸಾರ್ ಭರ್ ಸಬಾರ್ ಜೀವ್ ಹಾವೆಂ ಕಾಡ್ಲ್ಯಾತ್. ಹಾಂಗಾ ಏಕ್ ಕಾಂಯ್ ಥೊಡೆ ಜೀವ್ ಮ್ಹಜೆಥಾವ್ನ್ ಉರ್ತಿತ್ ತರ್, ತಿತ್ಲೆಂ ಪೂನ್ ಪುಣೀ ಮಾಕಾ ಮೆಳಾತ್, ಕಾಂಯ್ ನಾಂ ತರೀ ಹಾಕಾ ಇಂಟ್ರೂ ದಿಂವ್ಚ್ಯಾ ನಿಬಾನ್ ಹಾಕಾ ಚ್ಯಾರ್ ಯೆಟುನ್ ಸಾರ್ಕೊ ಕೆಲ್ಯಾರ್ ಕೊಂಕ್ಣಿ ಪರ್ಜೆಕ್ ಮ್ಹಣೀ ಫಾಯ್ದ್ಯಾಕ್ ಪಡತ್ ಮ್ಹಣ್ ಚಿಂತುನ್ ಕೊರೋನಾ ಮಣಾಲೆಂ ಜಾಯ್ತ್ ಹಾಂವ್ ತುಕಾ ಇಂಟ್ರೂ ದಿತಾಂ. ಪುಣ್ ಹಾಂವ್ ತುಕಾ ಮುಖಾಮುಖಿಂ ಭೆಟೊಂಕ್ ಖಂಡಿತ್ ಯೇನಾ. ಮಾಕಾ ತುಜೊ ವೊಸೊ ಲಾಗವ್ನ್ ಕಾಣ್ಘೆಂವ್ಕ್ ನಾಕಾ. ತುಂ ಅಸ್ಲೆಕಡೆ ಥಾವ್ನ್'ಚ್ ಮಾಕಾ ವೀಡಿಯೋ ಕೊಲ್ ಕರ್, ಹಾಂವ್ ತಾಚೆರ್'ಚ್ ಉಲಯ್ತಾಂ.
*******************************
ಬಾಬಣ್ಣಕ್ ವರ್ಣುಂಕ್ ಜಾಯ್ನಾ ತಿತ್ಲೊ ಸಂತೊಸ್. ಹಾವೆಂ ಕೆದ್ಯಾ ವ್ಹಡ್ ವ್ಹಡ್ ಮುಖೆಲಿಂಕ್ ಮಂಗ ಕರ್ನ್ ಇಂಟ್ರೂ ಕೆಲ್ಯಾ ಖಂಯ್, ಹೆಂ ಚಿಲ್ಲರ್ ವೈರಸ್ ಖಂಚೆಂ ಲೇಕ್ ಮಾಕಾ? ಮ್ಹಣ್ ಆಪ್ಣಾಯಿತ್ಲ್ಯಾಕ್ ಚಿಂತುನ್ ವಾಟ್ಸಾಪಾಚೆರ್ ಕೊರೋನಾ ವೈರಸಾಕ್ ಕೋಲ್ ಕರಿಲಾಗ್ಲೊ.
ಹಲೋ, ಹಾಯ್! ಹಾಂವ್ ಹಾಂವ್ ಇಂಟ್ರೂ ಬಾಬಣ್ಣ. ಮ್ಹಣ್ ಗತ್ತಾನ್ ಉಲಂವ್ಕ್ ಗೆಲ್ಲ್ಯಾ ಬಾಬಣ್ಣಕ್ ಅಜ್ಯಾಪ್ ರಾಕೊನ್ ಆಸುಲ್ಲೆಂ - ಕೊರೋನಾ ವೈರಸಾನ್ N-95 ಮಾಸ್ಕ್ ಘಾಲ್ನ್ ತಾಚೆ ವಯ್ಲ್ಯಾನ್ ಮಾತ್ಯಾಕ್ ಹೆಲ್ಮೆಟ್ ಘಾಲ್ಲೆಂ ಪಳೆವ್ನ್ ಬಾಬಣ್ಣಕ್ ಉತ್ರಾಂ ಸುಟ್ಲಿನಾಂತ್. ತುಂ ಡೇಂಜರಸ್ ಮ್ಹಣ್ ಸಕ್ಕಡ್ ಸಾಂಗ್ತಾತ್, ಪುಣ್ ತುಕಾ ಲೊಕಾವಯ್ರ್ ಇತ್ಲಿಯೀ ಕಾಳ್ಜಿ ಆಸಾಗೀ, ತುವೆಂ ಮಾಸ್ಕ್ ಘಾಲಾಂಯ್ ತಾಚೆ ವಯ್ಲ್ಯಾನ್ ಹೆಲ್ಮೆಟ್ ಘಾಲಾಂಯ್!
ಕಾಳ್ಜಿ ನ್ಹಯ್, ತುಜ್ಯಾ ಹರ್ದ್ಯಾಚೊ ಘುಡ್. ಹಾವೆಂ ಮಾಸ್ಕ್ ಆನಿ ಹೆಲ್ಮೆಟ್ ಘಾಲ್ಲೆಂ, ಕಂಯ್ ತುಜೆಲಾಗಿಂ ವೀಡಿಯೊ ಕೊಲಾರ್ ಉಲವ್ನ್ ತುಜೆ ಪಿಡೆಚೊ ವೊಸೊ ಮಾಕಾ ಲಾಗಾನಾ ಜಾಂವ್ ಮ್ಹಣ್!
ತುಂ ತಶೆಂ ಕಾಲೆಂ ಮ್ಹಣ್ತಾಯ್.. ಮಾಕಾ ಕಾಂಯ್ ಪಿಡಾ ನಾ. ಹಾಂವ್ ಕೊಂಕ್ಣಿತ್ಲೊ ಏಕ್ ಮಾತ್ರ್ ನಿಷ್ಟಾವಂತ್, ಶೀದಾ, ಖಡಾಖಡ್, ಸತ್ತಿ, ನಿಷ್ಪಕ್ಷಪಾತಿ ಪತ್ರಕರ್ತ್. ಮಾಕಾ ಸಮಾಜೆಂತ್ ಕಿತ್ಲಿ ಮರ್ಯಾದ್ ಆಸಾ ಜಾಣಾಂಯ್ ತುಂ?
ಮರ್ಯಾದ್ ಆನಿ ಮಾತ್ತಿ. ತುವೆಂ ಬರಯಿಲ್ಲೆಂ ವಾಚುನ್ ಪಾನ್ಪಡ್ ಖಾಯ್ನಾತ್ಲೆ ಸಯ್ತ್ ತೊಂಡಾಂತ್ ಬೀಡಾ ಘಾಲ್ನ್ ತುಜೆ ವಯ್ರ್ ಥುಕುಂಕ್ ರಾಕ್ತಾತ್. ಪುಣ್ ತಶೆಂ ಥುಕ್ಲ್ಯಾರ್ ಕಂಯ್ ತುಜೆ ಪಿಡೆಚೊ ವೊಸೊ ತಾಂಕಾಂ ಲಾಗತ್ ಮ್ಹಣ್ ತುಜೆ ಥಾವ್ನ್ ಪಯ್ಸ್ ಆಸಾತ್. ತ್ಯಾ ಪುರ್ವಿತಾಚ್ಯಾ ಕೇಸಿಂತ್ ತುವೆಂ ವ್ಹಡಿಲಾಂಕ್ ಆನಿ ಎಕಾ ಶಿಕ್ಷಕಾಕ್ ಅಕ್ಮಾನ್ ಕರುಂಕ್ ಕೊಣಾಥಾವ್ನ್ ಕಿತ್ಲೆ ಪಯ್ಶೆ ಘೆತ್ಲ್ಯಾಯ್ ಮ್ಹಳ್ಳೆಂ ಸಗ್ಳೆಂ ಲೇಕ್ ಆಸಾ ಮ್ಹಜೆಲಾಗಿಂ. ನ್ಹಯ್ ಸಾಯ್ಬಾ, ತುಕಾ ಇಂಟ್ರೂಚ್ಯಾ ನಾಂವಾನ್ ಮೆಲ್ಲ್ಯಾಂಚೆ ಫೊಂಡ್ ಉಸ್ತುಚೆಂಚ್ ಏಕ್ ಧಂದೊ ಗೀ..? ಪಯ್ಲೆಂ ಟಿಪ್ಪುಚೊ ಫೊಂಡ್ ಉಸ್ತುನ್ ಲೊಕಾಕ್ ದುಸ್ಪಟಾಯ್ಲೆಂಯ್ ಆತಾಂ ಪುರ್ವಿತಾಚೊ ಫೊಂಡ್ ಉಸ್ತುನ್ ದುಸ್ಪಟಾಯ್ತೆ ಆಸಾಯ್. ಪಿಡೆಕ್ ಲಾಗೊನ್ ಸಂಸಾರ್ ಸಾಂಡ್ಲೆಲ್ಯಾ ತ್ಯಾ ಸಾಹಿತಿಕ್ ಸಯ್ತ್ ತುವೆಂ ಸೊಡ್ಲೆಂನಾಂಯ್! ಮೆಲ್ಲ್ಯಾಂಚಿಂ ಮಾಸಾಂ ಖಾಂವ್ಚಿಂ ಮ್ಹಳ್ಯಾರ್ ತುಕಾ ತಿತ್ಲಿಯೀ ರೂಚ್ ಕಿತೆಂ?
ಹೆಂ ಪೂರಾ ತುಕಾ ಕಶೆಂ ಕಳಿತ್? ತುಂ ಆಯ್ಲೊಯ್ ಪೋರ್ ಪೋರ್ ಚೀನಾಥಾವ್ನ್.. ತುಕಾ ಹೆಂ ಆದ್ಲೆಂ ಪೂರಾ... ಉಲಂವ್ಕ್ ಉತ್ರಾಂ ಮೆಳ್ನಾಸ್ತಾಂ ಗಾಗೆಲೊ ಬಾಬಣ್ಣ.
ಮಾಕಾ ಕಶೆಂ ಕಳಿತ್ ಮ್ಹಣ್ತಾಯ್? ತುಜೆಂ ಸಕ್ಕಡ್ ಮಾಕಾ ಕಳಿತ್ ಆಸಾ. ಇತ್ಲೆಂ ಮಾತ್ರ್ ನ್ಹಯ್, ತನ್ಖಿ ಕೆಲ್ಲ್ಯಾ ಅಧಿಕಾರಿನ್ ತುಕಾ ಆಪವ್ನ್ ಸರ್ಸರಿ ಯೆಟುನ್ 'ಸಕ್ಕಡ್ ಬುರಾಕ್ ಧಾಂಪುನ್ ಬಸ್, ಮಾಕಾ ಮಜೆಂ ಕಾಮ್ ಕರುಂಕ್ ಸೊಡ್' ಮ್ಹಣ್ ಚತ್ರಾಯ್ ದಿಲ್ಲೆಂಯೀ ಕಳಿತ್ ಆಸಾ. ಇತ್ಲೆ ದೀಸ್ ತುಜೆ ಪೂರಾ ಬುರಾಕ್ ಬಂಧ್ ಆಸುಲ್ಲೆ, ಆತಾಂ ಪಯ್ಶೆ ದಿಲ್ಲೆ ತುಕಾ ವಿಚಾರ್ನ್ ಆಸಾತ್ ದೆಕುನ್ ಪರ್ತುನ್ ತುಜಿ ಶಿಮ್ಟಿ ವೊಂಕ್ಡಿ ಜಾಲ್ಯಾ.
ಹೇ ಕೊರೋನಾ.. ಪ್ಲೀಸ್ ಸುನೋ ನಾ.. ತೆಂ ವಿಷಯ್ ಕಾಲೆಂ ಗೀ ಮ್ಹಳ್ಯಾರ್ ತಾಣಿಂ ಪಯ್ಶೆ ದಿಲ್ಲೆ ವ್ಹಯ್, ತನ್ಖಿ ಅಧಿಕಾರಿನ್ ಮಾಕಾ ಚತ್ರಾಯ್ ಸಾಂಗುಲ್ಲಿಯೀ ವ್ಹಯ್, ಪಯ್ಶೆ ದಿಲ್ಲ್ಯಾನಿಂ ಆತಾಂ ಮಾಕಾ ಸವಾಲ್ ಕರ್ನ್ ಕಿತ್ಯಾಕ್ ಉಲಯ್ನಾಂಯ್ ಮ್ಹಣ್ ವಿಚಾರ್ ಕೆಲ್ಲೆಂಯೀ ವ್ಹಯ್. ಆತಾಂ ಮಾಕಾ ದುಸ್ರಿ ಕಾಂಯ್ ವಾಟ್ ನಾ. ಏಕ್'ಚ್ ತಾಂಕಾಂ ಪಯ್ಶೆ ಪಾಟಿಂ ದೀಜೆ, ನಾಂ ತರ್ ಪರತ್ ವಿಷಯ್ ದುಸ್ಪಟಾವ್ನ್ ಲೊಕಾಕ್ ಗೊಂದೊಳ್ ಹಾಡ್ಚೆ ತಸ್ಲಿ ವರ್ದಿ ಬರಯ್ಜೆ. ಹಾಂವ್ ಪಯ್ಶಾಂ ಖಾತಿರ್ ಕಿತೆಂ ಕರುಂಕೀ ತಯಾರ್ ಆಸ್ಚೊ ಮನಿಸ್. ದೆಕುನ್...
ನ್ಹಯ್ ಸಾಯ್ಬಾ. ತುಕಾ ಕಶೆಂಯೀ ಬಾಯ್ಲ್, ಭುರ್ಗಿಂ ಕುಟಾಮ್ ಕಾಂಯ್ ನಾ, ಸಾಮಾಜಿಕ್ ಸ್ಥಾನ್ ಮಾನ್ ಸಯ್ತ್ ನಾ, ಮಾನ್ ಮರ್ಯಾದ್ ತುಜೆ ಲಾಗ್ಗಿಂ ಸಯ್ತ್ ಯೇನಾಂತ್. ಪುಣ್ ತುವೆಂ ಪಯ್ಶಾಂಚ್ಯಾ ಅಬ್ಲೇಸಾನ್ ಕೊಣಾ ಕೊಣಾಚ್ಯಾ ವ್ಯಕ್ತಿತ್ವಾಚೆರ್ ಹಲ್ಲೊ ಕರ್ನ್ ಬರಯ್ಲಾಂಯ್ ಪಳೆ, ತಾಂಕಾಂ ಕುಟಾಮ್, ಸಾಮಾಜಿಕ್ ಸ್ಥಾನ್ ಮಾನ್, ಗೌರವ್ ಸಕ್ಕಡ್ ಆಸಾ. ತಾಂಚೆ ವಯ್ರ್ ಕಸಲೊ ಪರಿಣಾಮ್ ಪಡ್ಲಾ? ಮ್ಹಳ್ಳೆಂ ಏಕ್ ಘಡಿ ಚಿಂತುನ್ ಪಳೆಯ್ಲಾಂಯ್ಗೀ ತುವೆಂ? ಪಯ್ಶಾಂ ಖಾತಿರ್ ಗಳೊ ಲುಂವ್ತೆಲೊ ಸುಪಾರಿ ಕಿಲ್ಲರ್ ಕೇವಲ್ ತ್ಯಾ ವೆಕ್ತಿಚೊ ಜೀವ್ ಮಾತ್ರ್ ಕಾಡ್ತಾ. ಪುಣ್ ಪಯ್ಶಾಂ ಖಾತಿರ್ ಕೊಣಾ ಕೊಣಾಚ್ಯಾ ವೆಕ್ತಿತ್ವಾಚೆರ್ ಹಲ್ಲೊ ಕರ್ಚೊ ತುಜೆ ತಸಲೊ ಸುಪಾರಿ ಪತ್ರಕರ್ತ್ ಕೇವಲ್ ತ್ಯಾ ಎಕಾ ವೆಕ್ತಿಚೊ ಮಾತ್ರ್ ನ್ಹಯ್, ತಾಕಾ ಸಂಬಂಧ್ ಜಾಲ್ಲ್ಯಾಂಚೊಯೀ ಗೌರವ್ ನಾಸ್ ಕರ್ತಾ.
*************************************
ದುಸ್ರೊ ದೀಸ್...
21 ದಿಸಾಂಚ್ಯಾ Lock Down ಕ್ ಲಾಗೊನ್ ಖಂತೀಷ್ಟ್ ಜಾಲ್ಲ್ಯಾ ಲೊಕಾಂಕ್ ತ್ಯಾ ದಿಸಾ ಅಜ್ಯಾಪ್ ರಾಕೊನ್ ಆಸ್ಲೆಂ. ಸಗ್ಳ್ಯಾ ಮಾಧ್ಯಮಾನಿಂ ತೊಚ್ ಬ್ರೇಕಿಂಗ್ ನ್ಯೂಸ್, ತಿಚ್ ಖಬರ್. ಸಾಮಾಜಿಕ್ ಜಾಳಿಜಾಗ್ಯಾನಿಂ ಸಯ್ತ್ ತಿಚ್ ಖಬರ್. ವ್ಹಯ್, COVID-2019 ಮ್ಹಳ್ಳ್ಯಾ ಟ್ವೀಟರ್ ಹ್ಯಾಂಡಲಾ ಥಾವ್ನ್ ಏಕ್ ಟ್ವೀಟ್ ಜಾಲ್ಲೊ ತೊ ದೇಸ್ ಭರ್ ವೈರಲ್ ಜಾಲ್ಲೊ.
21 ದಿಸಾಂಚ್ಯಾ Lock Down ಕ್ ಲಾಗೊನ್ ಖಂತೀಷ್ಟ್ ಜಾಲ್ಲ್ಯಾ ಲೊಕಾಂಕ್ ತ್ಯಾ ದಿಸಾ ಅಜ್ಯಾಪ್ ರಾಕೊನ್ ಆಸ್ಲೆಂ. ಸಗ್ಳ್ಯಾ ಮಾಧ್ಯಮಾನಿಂ ತೊಚ್ ಬ್ರೇಕಿಂಗ್ ನ್ಯೂಸ್, ತಿಚ್ ಖಬರ್. ಸಾಮಾಜಿಕ್ ಜಾಳಿಜಾಗ್ಯಾನಿಂ ಸಯ್ತ್ ತಿಚ್ ಖಬರ್. ವ್ಹಯ್, COVID-2019 ಮ್ಹಳ್ಳ್ಯಾ ಟ್ವೀಟರ್ ಹ್ಯಾಂಡಲಾ ಥಾವ್ನ್ ಏಕ್ ಟ್ವೀಟ್ ಜಾಲ್ಲೊ ತೊ ದೇಸ್ ಭರ್ ವೈರಲ್ ಜಾಲ್ಲೊ.
Feeling Inferior! Today I interacted with an Infectious Virus (DP-420) in Coastal District of Karnataka, which is 1000 Times dangerous than me. This virus alone is good enough to Damage the 130 Cr. Population Here. Leaving India forever!
ಹೊ ಟ್ವೀಟ್ ದೇಶಾಚ್ಯಾ ಮುಖೆಲ್ಯಾನ್ ರಿಟ್ವೀಟ್ ಕೆಲ್ಲೊ. ತಾಚ್ಯಾ ಅಭಿಮಾನಿಂಚ್ಯಾ ಸಂತೊಸಾಕ್ ಗಡ್ ನಾತುಲ್ಲಿ. ಮಾಧ್ಯಮಾನಿಂ ಪೂರಾ ತಿಚ್ ಖಬರ್.
ಕೊರೋನಾವನ್ನು ಭಾರತದಿಂದ ಓಡಿಸಲು ರಣತಂತ್ರ ಹೆಣೆದ ರಣಕಲಿಗೆ ಜಯ.
ದೇಶಿ ತಳಿಯ ವೈರಸ್ ಅನ್ನು ಮುಂದಿಟ್ಟು ಕೊರೋನಾವನ್ನು ಹಿಮ್ಮೆಟ್ಟಿಸಿದ ವಿಶ್ವಗುರು.
ರಣಕಲಿಯ ತಂತ್ರಕ್ಕೆ ತಲೆಬಾಗಿದ ಅಮೇರಿಕಾ.
ಗಜಾಲ್ ಕಿತೆಂಯೀ ಆಸೊಂ, ತಾಂಕಾಂ ಜಾಯ್ ಆಸುಲ್ಲಿ ಕೂಸ್ ಮಾತ್ರ್ ಫಾಯ್ಸ್ ಕರ್ಚ್ಯಾ ಮಾಧ್ಯಮಾನಿಂ ಕೊರೋನಾ ಭಾರತ್ ಸಾಂಡುನ್ ಗೆಲಾಂ ಮ್ಹಳ್ಳ್ಯಾ ಸಂಗ್ತಿಕ್ ಮಾತ್ರ್ ಗುಮಾನ್ ದಿಲ್ಲೆಂ ಶಿವಾಯ್ ತಾಚ್ಯಾಪ್ರಾಸ್ ವಿಕಾಳ್ ವೈರಸ್ ಹಾಂಗಾ ಆಸಾ ಮ್ಹಳ್ಳ್ಯಾ ಸಂಗ್ತಿಕ್ ಗುಮಾನಾಕ್ ಘೆಂವ್ಕ್ ನಾತುಲ್ಲೆಂ. ಲೊಕಾಕ್ ಸಯ್ತ್ ತಿತ್ಲೆಂ ಮಾತ್ರ್ ದಿಸುಲ್ಲೆಂ ದೆಕುನ್ ದೇಶ್ ಭರ್ ಫೆಸ್ತಾಚೆಂ ವಾತಾವರಣ್!
ಹ್ಯಾ ಸಂಭ್ರಮಾಮಧೆಂ ವಿರೋದ್ ಪಾಡ್ತೆಚ್ಯಾ ಮುಖೆಲಿನ್ ಕೆಲ್ಲೊ ಟ್ವೀಟ್ ಮಾತ್ರ್ ಕೊಣಾಯ್ಚ್ಯಾ ಗುಮಾನಾಕ್ ಗೆಲೊಚ್ ನಾ.
Nation is free from COVID-19. But its not time for celebration. The venomous Virus detected in Mangalore is 1000 times more dangerous than COVID-19. GOI must take action to Isolate the people infected with DP-420 and direct NIV to work for an antidote immediately.
